Байғусҡаров Зариф Закир улы

Зариф Закир улы Байғусҡаров 1967 йылдың 30 июнендә Башҡорт АССР-ы Күгәрсен районы Ҡәҙир ауылында көтөүсе ғаиләһендә тыуа.

1984 йылда Ҡалдар урта мәктәбен, 1994 йылда Башҡорт дәүләт университетының юридик факультетын тамамлай.

1984—1986 йылдарҙа Күгәрсен районының Максим Горький исемендәге колхозында эшләй.

1986—1988 йылдарҙа Совет Армияһында хеҙмәт итә.

1988—1997 йылдарҙа Өфө ҡалаһының Киров район халыҡ судында пристав-башҡарыусы булып эшләй.

1998 йылдың 11 сентябрендә Рәсәй Федерацияһы Президенты Указы менән Өфө ҡалаһының Калинин районы суды судьяһы итеп тәғәйенләнә.

2001—2004 йылдарҙа республиканың баш суд приставы — Рәсәй Федерацияһы Юстиция министрлығының Башҡортостан Республикаһы буйынса Баш идаралығының начальник урынбаҫары була^[3].

2005—2016 йылдарҙа Суд приставтары Федераль хеҙмәтенең Башҡортостан Республикаһы буйынса идаралығы етәксеһе — Башҡортостан Республикаһының баш суд приставы вазифаһын биләй.

2016 йылдан — Рәсәй Федерацияһының VII саҡырылыш Дәүләт Думаһы депутаты. 7-се бер мандатлы Салауат һайлау округынан (Башҡортостан Республикаһы) һайлана. «Берҙәм Рәсәй» фракцияһы, Дәүләт Думаһының Дәүләт ҡоролошо һәм ҡануниәт буйынса комитеты ағзаһы.

2020 йылдан — Башҡортостан Республикаһының Ирҙәр советы рәйесе.

2021 йылда VIII саҡырылыш Дәүләт думаһына һайлауҙа бер мандатлы 7-се Салауат һайлау округы буйынса «Берҙәм Рәсәй» сәйәси партияһы вәкиле булараҡ депутат итеп һайлана. Тауыш биреү көндәрендә участкаларға килгән һайлаусыларҙың 64,50 проценты Зариф Байғусҡаров өсөн тауыш бирә^[4].

2022 йылдың 30 июнендә Салауат Юлаев ордены менән бүләкләнә^[5].

2024 йылдың 21 ноябрендә Зариф Байғусҡаров закон проектын тикшереүҙә ҡатнаша^[6].

2024 йылдың 17 октябрендә Дәүләт думаһының экология, тәбиғәт ресурстары Һәм тирә-яҡ мөхитте һаҡлау буйынса Комитеты ағзаһы Зариф Байғусҡаров «Парламент гәзите»нә ташландыҡ карьерҙар проблемалары буйынса интервью бирә^[7].

2016 йылдан 2019 йылға тиклем, VII Саҡырылыш Дәүләт думаһы депутаты вәкәләттәрен үтәгәндә, 34 закон сығарыу башланғысы һәм федераль закон проекттарына төҙәтмәләр авторы була^[8]. Дәүләт думаһы ултырыштарында 675 тапҡыр сығыш яһай. 2020 йылда депутатҡа мөрәжәғәт итеүселәр һаны 1249 (шуларҙың 297-һе — шәхси ҡабул итеүҙәрҙә, 710-ы — дәүләт думаһына килгән, 242-һе — төбәктә ҡабул ителгән).

• 2022 йылдың 23 февралендә Европа берлегенең санкция исемлегенә индерелә^[9].
• 2022 йылдың 24 мартында АҠШ-тың санкция исемлегенә индерелә^[10].
• Һуңыраҡ Бөйөк Британия, Канада, Швейцария, Австралия, Украина һәм Яңы Зеландияның санкция исемлектәренә индерелә.

2023 йылдың 22 мартында Украинаның «территориаль бөтөнлөгөнә һәм тейелгеһеҙлегенә баҫым яһау» статьяһы буйынса Украина суды ситтән тороп Байғусҡаровты, мөлкәтен конфискациялап, 15 йылға иркенән мәхрүм итеүгә хөкөм итә.

• Ҡатыны — Гөлназ Ҡолһарина, «Тамыр» («Башҡортостан» ДУП ТРК) балалар-үҫмерҙәр телеканалы етәксеһе.
• Улы һәм ҡыҙы бар.

• Рәсәй федерацияһының 1-се класлы дәүләт юстиция советнигы (2007).
• Башҡортостан Республикаһының атҡаҙанған юрисы (2007).
• Суд приставтары федераль хеҙмәтенең почетлы хеҙмәткәре.
• Рәсәй Федерацияһы Президентының Рәхмәт хаты (2009).
• Салауат Юлаев ордены (2022).
• «Анатолий Кони», «Рәсәй Юстиция министрлығының 200 йыллығы хөрмәтенә», «Суд приставтары федераль хеҙмәтен үҫтереүгә индергән өлөшө өсөн», «Суд приставтарының федераль хеҙмәтенә 10 йыл», III, II һәм I дәрәжә «Хеҙмәт өсөн», «Ҡаҙаныш өсөн», «Фиҙаҡәрлек өсөн» миҙалдары, шулай уҡ исемле хәрби ҡорал менән бүләкләнгән.