Ғүмәрова Лилиә Салауат ҡыҙы

Лилиә Салауат ҡыҙы Ғүмәрова 1976 йылдың 16 декабрендә Башҡорт АССР-ының Учалы ҡалаһында тыуған.

1994 йылда Башҡорт дәүләт педагогия университетының педагогика һәм психология факультетын тамамлаған.

Хеҙмәт эшмәкәрлеген шул уҡ йылда Учалы ҡалаһының 10-сы урта мәктәбендә педагог-психолог, психология уҡытыусыһы булып башлай.

2001 йылдан — Учалы ҡалаһы һәм Учалы районы хакимиәтенең I категориялы (рус.)баш. белгесе, артабан хакимиәт башлығының социаль мәсьәләләр буйынса урынбаҫары.

2005 йылда Башҡортостан Республикаһы Президенты ҡарамағындағы Башҡортостан дәүләт хеҙмәте һәм идара итеү академияһын «юриспруденция» һөнәре буйынса тамамлай.

2007 йылдан — Башҡортостан Республикаһы Хөкүмәте социаль үҫеш, һаулыҡ һаҡлау, хеҙмәт һәм халыҡ мәшғүллеге бүлеге мөдире.

2010—2011 йылдарҙа — Башҡортостан Республикаһында Бала хоҡуҡтары буйынса вәкил^[3].

2011 йылдың 14 мартында «Берҙәм Рәсәй» партияһынан 28-се Отрада һайлау округы буйынса Башҡортостан Республикаһы Дәүләт Йыйылышы — Ҡоролтай депутаты (рус.)баш. итеп һайлана^[4]. 2011 йылдың 15 мартында Башҡортостан Республикаһы Дәүләт йыйылышы — Ҡоролтай рәйесе урынбаҫары итеп һайлана^[5].

2012 йылдың 24 октябрендә Ғүмәрова Башҡортостан Республикаһы Хөкүмәте рәйесе урынбаҫары итеп тәғәйенләнә^[6].

2014 йылдың 25 сентябрендә Башҡортостан Президенты Рөстәм Хәмитов Ғүмәроваға Башҡортостан Республикаһы дәүләт власының башҡарма органынан Рәсәй Федерацияһы Федераль Йыйылышының Федерация Советында сенатор вәкәләттәрен бирә^[7][8]. 2019 йылдың 19 сентябрендә Башҡортостандың яңы Башлығы Радий Хәбиров уның вәкәләттәрен оҙайта^[9].

2014 йылдың 1 октябренән — Федерация Советының Фән, мәғариф һәм мәҙәниәт буйынса комитеты (рус.)баш. рәйесенең беренсе урынбаҫары^[10].

2015 йылдың 18 декабрендә Башҡорттарҙың федераль милли-мәҙәни автономияһы советы рәйесе итеп һайлана^[11].

2019 йылдың 25 сентябрендә Ғүмәрова РФ Федерация советының Фән, мәғариф һәм мәҙәниәт буйынса комитеты рәйесе итеп һайлана^[12][13].

2024 йылдың 26 сентябренән Лилиә Ғүмәрова яңынан Фән, мәғариф һәм мәҙәниәт буйынса совет комитеты рәйесе итеп һайлана^[14].

Федерация Советының Мәғариф, фән һәм мәҙәниәт буйынса комитет рәйесенең беренсе урынбаҫары вазифаһын башҡарған Лилиә Ғүмәрова Рәсәй күләмендә үткәрелгән төрлө сараларҙа әүҙем ҡатнаша.

• Шундай уҡ маҡсаттар менән ул Башҡортостанда ла йыш була^[15]
• 2015 йылда 1 октябрҙән 5-нә тиклем уҙған «Сочи-2015» Халыҡ-ара инвестиция форумы эшендә ҡатнаша^[16].
• «Parlamentarium» ғилми бәхәс клубы эшмәкәрлегенә ярашлы, Башҡортостан дәүләт хеҙмәте һәм идара итеү академияһы уҡытыусылары һәм студенттары менән осраша^[17].

• 2010 йылдан — Башҡортостан Республикаһының ЮНЕСКО эштәре буйынса комитеты ағзаһы^[18];
• 2016 йылдан — Спиваков фондының Попечителлек советы рәйесе^[18];
• 2018 йылдан — «Йыл ғаиләһе» Бөтә Рәсәй конкурсының Ойоштороу комитеты рәйесе^[18];
• 2019 йылдан — Башҡорттарҙың федераль милли-мәҙәни автономияһы советы рәйесе^[18];
• 2019 йылдан — «Берҙәм Рәсәй» партияһының «Көслө ғаилә» проекты координаторы^[18];
• 2019 йылдан — Евразия ҡатын-ҡыҙҙар форумы советы ағзаһы^[18];
• 2020 йылдан — «Минең илем — минең Рәсәйем» Бөтә Рәсәй конкурсының эксперт советы рәйесе^[18].

Украиналағы хәрби хәрәкәттәр фонында Лилиә Ғүмәрова 2022 йылдың 9 мартынан Европа Берлеге санкциялары аҫтында. 2022 йылдың 15 мартынан — Бөйөк Британия санкциялары аҫтында. 2022 йылдың 30 сентябренән — АҠШ санкциялары аҫтында. Шулай уҡ Канада, Швейцария, Австралия һәм Яңы Зеландия санкциялары аҫтында тора.

• Башҡортостан Республикаһының Почёт грамотаһы (2015) ^[19];
• II дәрәжә Ватан алдындағы хеҙмәттәре өсөн орденының миҙалы (2018) — Рәсәй дәүләтселеген нығытыуҙа, парламентаризмды үҫтереүҙә һәм закон сығарыу эшмәкәрлегендә күрһәткән әүҙем хеҙмәттәре өсөн;
• Дуҫлыҡ ордены (2022) — Рәсәй дәүләтселеген нығытыуға, парламентаризмды үҫтереүгә ҙур өлөш индергәне һәм әүҙем закон сығарыу эшмәкәрлеге өсөн^[20];
• «МПА СНГ. 25 лет» миҙалы (27 март 2017 йыл, БДБ-ның Парламент-ара ассамблеяһы) — парламентаризмды үҫтереү һәм нығытыу эшендәге ҡаҙаныштары, Бойондороҡһоҙ Дәүләттәр Берләшмәһе эшмәкәрлегенең хоҡуҡи нигеҙҙәрен үҫтереүгә һәм камиллаштырыуға индергән өлөшө, халыҡ-ара бәйләнештәрҙе һәм парламент-ара хеҙмәттәшлекте нығытыуы өсөн^[21].
• II дәрәжә П. А. Столыпин миҙалы (2024)^[22].