Башҡортостан Республикаһының Дәүләт гербы

Башҡортостан Республикаһының Дәүләт гербы
Деталдәр
Раҫланған	12 октябрь 1993
ДГР номеры	164
Художник	Фазлетдин Ислахов

Башҡортостан Республикаһының Дәүләт гербы (рус. Герб Республики Башкортостан) — Башҡортостандың дәүләт символы.

Тарихы

Башҡортостан Республикаһының 1993 йылдың 12 октябрендәге «Башҡортостан Республикаһының Дәүләт гербы тураһында» законы менән раҫлана, 1999 йылдың 6 июлендә ҡайтанан раҫлана. Рәсәй Федерацияһының дәүләт геральдика регистрында 164 һаны менән теркәлгән. Авторы — Фазлетдин Фәррәх улы Ислахов.

Тасуирламаһы

Башҡортостан Республикаһының Дәүләт гербында милли биҙәк менән уратып алынған түңәрәк эсендә ҡалҡып килеүсе ҡояш һәм уның нурҙары фонында Салауат Юлаев һәйкәле һүрәтләнә. Түбәндәрәк — ҡурай сәскәһе тажы. Герб нигеҙенә Башҡортостан Республикаһының Дәүләт флагы төҫтәрендәге, аҡ юлына «Башҡортостан» тип яҙылған таҫма төшөрөлгән. Салауат Юлаев һәйкәле һәм биҙәк — алтынһыу, ҡурай сәскәһе — йәшел, ҡалҡып килеүсе ҡояш — асыҡ алтынһыу төҫтә, ҡояш нурҙары — һары, һәйкәл менән орнамент араһындағы фон — аҡ, эске һәм тышҡы түңәрәктәр — ҡуйы алтынһыу төҫтә.

Гербта башҡорт халҡының милли батыры Салауат Юлаев һәйкәле — азатлыҡ һәм ғәҙеллек өсөн көрәшеүсе дөйөмләштерелгән яугир егет образы, ул Башҡортостан халыҡтарының дуҫлығын һәм берҙәмлеген символлаштыра.

Зәңгәр төҫ — Башҡортостан Республикаһы халыҡтарының асыҡлығын, изгелеген һәм уй-ниәттәренең сафлығын; аҡ төҫ — Башҡортостан Республикаһы халыҡтарының тыныслыҡты һөйөүен, эскерһеҙлеген, үҙ-ара хеҙмәттәшлеккә әҙер булыуын; йәшел төҫ — иректе, тормоштоң мәңгелеген аңлата.

Ҡурай сәскәһе — дуҫлыҡ символы, ете тажы Башҡортостан Республикаһы территорияһында йәшәүсе халыҡтарҙың берләшеүенә нигеҙ һалыусы ете ырыуҙы символлаштыра.

Шулай уҡ ҡарағыҙ

• Башҡортостан гимны
• Башҡортостан флагы
• Башҡорт АССР-ы гербы

Иҫкәрмәләр

Һылтанмалар

• «Рәсәй менән 450 йыл» сайтында герб һәм гимн тураһында 2007 йылдың 4 ноябрь көнөндә архивланған.
• «Гералдика» сайтында Герб Республики Башкортостан