Стәрлебаш районы флагы

Стәрлебаш районы флагы
Автор	Ғиләжетдинов Салауат Мөхәмәт улы
Дәүләт	Рәсәй
Нигеҙләү датаһы	17 июль 2006
Юрисдикция таралышы	Стәрлебаш районы

Стәрлебаш районы флагы — Башҡортостан Республикаһы Стәрлебаш районы муниципаль районының рәсми символы һәм район халҡының берҙәмлеге билдәһе.

Тарихы

Стәрлебаш районының флагы 2006 йылдың 17 июлендә Стәрлебаш районы муниципаль советының 9-4 ҡарары менән раҫлана һәм Рәсәй Федерацияһының Дәүләт геральдика регистрында — 3013, Башҡортостан Республикаһының Дәүләт символикаһы исемлегенә 054 һаны менән теркәлә. Авторы — Салауат Ғиләжетдинов.

Тасуирламаһы

Өҫкө, флагтың иңенең 4/5 өлөшөнә тиң зәңгәр төҫтәге һәм аҫҡы һары төҫтәге ике горизонталь һыҙаттан торған, киңлеге оҙонлоғона 2:3 нисбәтендәге тура мөйөшлө туҡыма. Зәңгәр ерлектә асыҡ аҡ китап һүрәтләнгән, уның өҫтөнән оҙон һабаҡлы һары башаҡ төшөрөлгән.

Нигеҙләү

Стәрлебаш районы флагы райондың тарихи, мәҙәни һәм иҡтисади үҙенсәлектәрен иҫәпкә алып эшләнгән герб нигеҙендә булдрыла.

Төп фон булған зәңгәр төҫ матурлыҡты, дәрәжәне, тоғролоҡто, ышанысты, шулай уҡ үҫеште һәм алға барыуҙы символлаштыра.

Ошо нигеҙҙә асыҡ китап урын алған, ул Стәрлебашта билдәле мәҙрәсә булыуын күрһәтә. Унда XVIII—XIX быуаттарҙың төрлө милләттән булған билдәле шәхестәре — рухи эшмәкәрҙәр, әҙәбиәтселәр, ғалим-мәғрифәтселәр, уҡытыусылар белем алған. Стәрлебаш мәҙрәсәһен тамамлаусылар араһында Мифтахетдин Аҡмулла — башҡорттарҙы белем алыуға саҡырған шағир, философ, мәғрифәтсе — ла бар.

Китап уртаһында һүрәтләнгән һары башаҡ халыҡтың йәшәү көсөн, хеҙмәт менән булдырылған именлеген сағылдыра.

Һары төҫ — райондың алтын иген яландары символы.

Шулай уҡ ҡарағыҙ

• Стәрлебаш районы гербы

Сығанаҡтар

• Флаг Стерлибашевского района
• Муниципальный район Стерлибашевский район Республики Башкортостан
• Виртуальный музей. Башкирская академия государственной службы и управления при Главе Республики Башкортостан