Ғафури районы флагы

Киңлеге оҙонлоғона 2:3 нисбәтендәге, 1:3:1 нисбәтенә тура килгән йәшел, аҡ һәм йәшел вертикаль һыҙаттарҙан торған, уларҙың сиктәре тулҡын рәүешендә эшләнгән тура мөйөшлө туҡыма. Урталағы аҡ һыҙат эсендә биш йүнәлештә атҡан зәңгәр төҫтәге фонтан.

Ғафури районы флагы райондың тарихи һәм мәҙәни үҙенсәлеген күҙ уңында тотоп эшләнгән герб нигеҙендә булдырылған. Ғафуриҙар ере Башҡортостандың ҡап уртаһында, Табын һәм Юрматы башҡорттарының тарихи ерҙәрендә, Ағиҙел ярында, сал Урал итәгендә урынлашҡан.

Төп фигура булып крайҙың ҡабатланмаҫ матурлығын, уның үҙенсәлекле дауалау сығанаҡтары, көкөрт водороды һәм дауалау батҡаҡтарына байлығын күрһәткән зәңгәр фонтан тора. Тәбиғи факторҙарҙың һирәк ҡушылмаһы, изге сығанаҡтарҙың дауалау көсө район территорияһында республиканан ситтә лә билдәле «Красноусол» курортын асыуға нигеҙ була.

Райондың урманға бай булыуы һәм тупраҡтың уңдырышлылығы алтын ҡусҡар биҙәкле йәшел ағастар рәүешендә бирелгән. Йәшел төҫ шулай уҡ муллыҡ, шатлыҡ, һиллек һәм тыныслыҡты аңлата. Кесе һәм Кәлсер — табындарҙың һәм юрматыларҙың тамғаларының берләштерелеүе халыҡ хәтерен һәм тарихҡа хөрмәтте сағылдыра. Гербтың төп ҡыры көмөш төҫөндә бирелгән. Ул райондың күп милләтле халҡына хас иман, рухиәт, абруй, сафлыҡ һәм ихласлыҡты символлаштыра. Алтын ҡусҡар орнаменты ғафуриҙарҙың борон да, хәҙер ҙә ер эшкәртеү, малсылыҡ менән шөғөлләнеүен күрһәтә.