Ғабдуллин Наил Талха улы

Наил Талха улы Ғабдуллин 1946 йылдың 10 декабрендә Башҡорт АССР-ының Әбйәлил районы Байым ауылында тыуған.

1970 йылда Башҡорт дәүләт медицина институтының дауалау факультетын тамамлай. Совет Армияһы сафында хеҙмәт итә. Хеҙмәт эшмәкәрлеген 1973 йылда Ғ. Ғ. Ҡыуатов исемендәге Республика клиник дауаханаһының ЛОР бүлеге ординаторы булып башлай.

1975 йылда Мәскәү ҡолаҡ, тамаҡ һәм танау фәнни-тикшеренеү институтында курстар үткәндән һуң, РКБ-ла фониатрия хеҙмәтен етәкләй. Пациенттарының профессияһының үҙенсәлеген аңлау өсөн Өфө сәнғәт училищеһын, һуңынан Өфө дәүләт сәнғәт институтын тамамлай^[2].

Аспирантура тамамалап, кандидатлыҡ диссертацияһы яҡлай.

1984 йылдан Башҡорт дәүләт медицина институтының оториноларингология кафедраһына ассистент итеп саҡырыла. 1994 йылда, кафедра доценты булараҡ, БДМУ ҡарамағында диплом алғандан һуң белем алыу институтында оториноларингологтарҙың белемен камиллаштырыу курстарын етәкләй.

2000—2001 йылдарҙа Өфө ҡалаһы хакимиәтенең Һаулыҡ һаҡлау идаралығы начальнигы урынбаҫары булып эшләй.

2001—2011 йылдарҙа «Йәшел сауҡалыҡ» шифаханаһының баш табибы була.

Башҡорт дәүләт академия опера һәм балет театрының табиб-фониаторы, шулай уҡ тауыш аппараты ағзалары сирлеләргә консультация ярҙамы күрһәтә, бер үк ваҡытта Заһир Исмәғилев исемендәге Өфө дәүләт сәнғәт институтында буласаҡ йырсыларҙы һәм актерҙарҙы ҡабул итә.

2025 йылдың 25 июнендә Өфө ҡалаһының почётлы гражданы исеме бирелә^[3].

Ауыр лор-сирлеләргә операциялар эшләү, тамаҡтың һәм ҡурылдайҙың өҫкө бүлектәренең паралитик, йөйлө стенозы пациенттарға хирургик реабилатация, тамаҡ шештәрен алыу.

Оториноларинтология (рус.)баш. һәм шифахана-курорт дауалауының көнүҙәк мәсьәләләре буйынса 150-нән ашыу фәнни мәҡәлә авторы.

• Өфө ҡалаһының почётлы гражданы (2025);
• Рәсәй Федерацияһының атҡаҙанған табибы (2005);
• Башҡортостан Республикаһының атҡаҙанған табибы (1995).