Ғәтиәтуллин Мамун Лотфулла улы

17 йәшендә — 1942 йылдың авгусында хәрби хеҙмәткә саҡырыу ала һәм Алкин күнекмә лагерына ебәрелә. Медкомиссия үткәндән һуң иң яҡшы биш курсантты ул ваҡытта Стәрлетамаҡҡа эвакуацияланған Рига хәрби училищеһына уҡырға ебәрәләр. Унда ике йыл урынына алты ай уҡығандан һуң, 1943 йылдың февраль башында фронтҡа Белгород өлкәһенә оҙатыла. Северский Донец йылғаһын обороналауҙа ҡатнаша. Тәүҙә снарядсы, һуңынан — 120 миллиметрлыҡ миномёт тоҫҡаусыһы, һуңынан — ут взводының расчет идараһы командиры, һуғыш ахырына 47-се гвардия уҡсылар полкының миномет батареяһы командиры урынбаҫары була. Украина, Молдавия, Польша, Чехословакияны азат итеүҙә ҡатнаша. Бөйөк Еңеүҙе Прагала ҡаршылай^[2]. 1947 йылда демобилизациялана.

Хеҙмәт эшмәкәрлеген 1941 йылдың июнендә башлай — Бәләбәй районының Знаменка ауылындағы спирт заводына эшкә керә. Һуғыштан һуң, тыныс тормошта аҙыҡ-түлек сәнәғәтендә эшләй. 1962 йылда Ҡариҙел районының Ҡыҙыл Үреш ҡасабаһында спирт заводы директоры итеп тәғәйенләнә. Һуңынан хаҡлы ялға сыҡҡансы Стәрлетамаҡ ҡала һөт заводы менән еткәселек итә, Өфө күн аяҡ кейемдәре комбинатында эшләй^[2].

Әүҙем йәмәғәт эшмәкәрлеге алып бара. 15-се гвардия дивизияһы ветерандары советын ойоштороуҙа ҡатнаша, 1983 йылдан уның ағзаһы, 1987—1995 йылдарҙа рәйес урынбаҫары була. 1995 йылдан Өфө ҡалаһының Совет районы ветерандары советы рәйесе, шулай уҡ Башҡортостан Республикаһының Бөйөк Ватан һуғышы һәм Ҡораллы Көстәре ветерандары комитеты ағзаһы. Уның инициативаһы менән баш ҡаланың 117-се мәктәбендә Хәрби дан музейы ойошторола^[2]. 1955 йылдан алып участка һайлау комиссияһы рәйесе була, 1964 йылда БАССР Юғары Советына депутаттар һайлау буйынса округ һайлау комиссияһы рәйесе итеп тәғәйенләнә, 1965 йылдың 14 мартында хеҙмәтсәндәрҙең Ҡариҙел район Советы депутаты итеп һайлана^[3].