Ҡыуатова Леонора Сафа ҡыҙы

Леонора Сафа ҡыҙы Ҡыуатова 1948 йылдың 9 ноябрендә Өфө ҡалаһында тыуған^[2]. Сығышы менән Ҡыуатовтар башҡорт дворян ырыуынан.

Ленинград хореография училищеһында уҡый, уның педагогтары араһында И. А. Трофимова менән А. И. Пушкин да була. Мәктәп сәхнә практикаһында Михаил Барышников менән С. М. Киров исемендәге театр сәхнәһендә бейей, Василий Вайнонендың «Щелкунчигында» төп партияны башҡара.

1967 йылда училищены тамамлағандан һуң Башҡорт дәүләт опера һәм балет театрына алына. 1993 йылға тиклем балет труппаһының солисы була. Германия, Польша, Венгрия, Италия, Франция, Португалия, Голландия, АҠШ, Һиндостан, Вьетнам, Мексика, Японияға гастролдәргә сыға.

2009 йылдан Башҡорт дәүләт опера һәм балет театрының балет труппаһының баш балетмейстеры һәм художество етәксеһе^[3]. Өфөлә үткән Рудольф Нурыев исемендәге Халыҡ-ара балет сәнғәте фестиваленең художество етәксеһе була (2009, 2010, 2011).

М. Фокиндың «Шопениана», Л. Лавровскийҙың «Вальпургиева ночь» балеттарын, М. Петиптың «Баядерка»һында күләгәләр актын сәхнәләштерә. Шулай уҡ «Обояние классики» классик һәм заманса хореография номерҙары программаһының режиссёры ла.

2026 йылда «Арабеск» балет артистары конкурсының жюри сосотавына инә^[4][5].

1987 йылда Өфө хореография училищеһында (хәҙер — Рудольф Нурыев исемендәге башҡорт хореография колледжы) классик бейеү уҡыта башлай, 1994 йылда уҡыу йортоноң художество етәксеһе итеп тәғәйенләнә^[6], был вазифала өҙөклөктәр менән (2005—2007 йылдарҙа) 2021 йылға тиклем эшләй^[1].

2002 йылдан Башҡорт дәүләт опера һәм балет театрында педагог-репетитор булып эшләй. Шамил Тереғолов менән бергә Японияла, балерина Ёко Цукамотоның балет студияһында эшләй, Японияла, Төркиәлә, Италияла оҫталыҡ дәрестәре бирә.

Уҡыусылары араһында — балериналар Наталья Сологуб^[7], Ирина Сапожникова, Лариса Олимпиева, Гөлсинә Мәүлекәсова, Римма Закирова, Лилиә Зәйниғәбдинова һәм Әминә Халиҡова бар^[8][9].

• Одетта-Одиллия, «Аҡҡош күле», П. И. Чайковский;
• принцесса Аврора, «Спящая красавица», П. И. Чайковский;
• Жизель, «Жизель», А. Адан;
• Китри, «Дон Кихот», Л. Минкус;
• Золушка, «Золушка», С. С. Прокофьев;
• Мария, «Бахчисарайский фонтан», Б. В. Асафьев;
• Анель, «Большой вальс», И. Штраус музыкаһына;
• Эвридика, «Орфей», Е. Фомин;
• Керри, «Сестра Керри», Р. Паулс;
• Сөйөмбикә, «Шүрәле», Ф. З. Яруллин;
• Зәйтүнгөл, «Сыңрау торна», Л. Б. Степанов, З. Ғ. Исмәғилев;
• Айһылыу, «Яратам һине, тормош», Н. Ғ. Сабитов;
• Айгөл, «Айгөл иле», Н. Ғ. Сабитов (партияны беренсе башҡарыусы).

• «Владимир Ильич Лениндың тыуыуына 100 йыл тулыу уңайынан. Фиҙакәр хеҙмәт өсөн» миҙалы (1971);
• БАССР‑ҙың атҡаҙанған (1971) һәм халыҡ артисы (1974);
• РСФСР‑ҙың халыҡ артисы (1982);
• Салауат Юлаев исемендәге дәүләт премияһы (1988);
• «Балет» журналының «Мэтр танца» номинацияһында «Душа танца» призы лауреаты (2011);
• «Видеть музыку» Бөтә Рәсәй музыкаль тетарҙар фестиваленең «легенда» премияһы лауреаты (2017);
• Салауат Юлаев ордены (2023);
• Өфө ҡалаһының почётлы гражданы (2019)^[10].

Артист һәм балетмейстер Шамил Тереғоловтоң ҡатыны (1947—2008). Улы — Булат^[11]